(ភ្នំពេញ) ៖ ប្រមុខដឹកនាំកម្ពុជាសម្ដេចតេជោ ហ៊ុន សែន នាយករដ្ឋមន្ដ្រី នៃកម្ពុជាបានគូសបញ្ជាក់ថា ការទទួលពានរង្វាន់សមិទ្ធផលពេញមួយជីវិតរបស់មេដឹកនាំពិភពលោកនាពេលនេះ គឺជាសក្ខីកម្មនៃភាពជោគជ័យដ៏ត្រចេះត្រចង់នៃការដឹកនាំដ៏ត្រឹមត្រូវរបស់រាជរដ្ឋាភិបាលកម្ពុជា ពិសេសតាមរយៈការអនុវត្ត «គោលនយោបាយឈ្នះ-ឈ្នះ>។
ថ្លែងក្នុងឱកាសទទួលពានរង្វាន់ «សមិទ្ធផលពេញមួយជីវិតរបស់មេដឹកនាំឆ្នើម» ប្រគល់ជូនដោយវិទ្យាស្ថានយុទ្ធសាស្ដ្រសម្រាប់អាស៊ីហ្វិក (KSI) ស្ដីពី«ការបង្កើតទំនាក់ទំនងអាស៊ាន-ចិន» ដែលពិធីនេះប្រារព្ធធ្វើឡើងនៅវិមានសន្តិភាព នាថ្ងៃទី១៩ ខែធ្នូ ឆ្នាំ២០២២ បានបញ្ជាក់ថា៖«ការទទួលបាននូវពានរង្វាន់ដ៏វិសេសវិសាលនេះ គឺជាសក្ខីកម្មនៃភាពជោគជ័យដ៏ត្រចះត្រចង់នៃការដឹកនាំដ៏ត្រឹមត្រូវរបស់រាជរដ្ឋាភិបាលកម្ពុជា ជាពិសេសតាមរយៈការអនុវត្ត«គោលនយោបាយឈ្នះ-ឈ្នះ» ដែលបាននាំមកនូវការបង្រួបបង្រួមជាតិ, សន្តិភាព និងស្ថិរភាពនយោបាយ។
ការណ៍នេះ បានក្លាយជាចលករ និងចន្ទល់ដ៏រឹងមាំក្នុងការជំរុញកំណើនសេដ្ឋកិច្ចកម្ពុជាឱ្យសម្រេចបានក្នុងអត្រា៧ ភាគរយ ជាមធ្យមប្រចាំឆ្នាំរហូតធ្វើឱ្យកម្ពុជាក្លាយជាប្រទេសមានចំណូលមធ្យមកម្រិតទាបនៅក្នុងឆ្នាំ២០១៥ និងកំពុងបោះជំហានឆ្ពោះទៅជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និង ប្រទេសមានចំណូលខ្ពស់នៅឆ្នាំ២០៥០។
សម្ដេចតេជោ ហ៊ុន សែន ក៏បានថ្លែងអំណរគុណយ៉ាងជ្រាលជ្រៅចំពោះគណៈកម្មាធិការនៃវិទ្យាស្ថានយុទ្ធសាស្ត្រសម្រាប់អាស៊ីប៉ាស៊ីហ្វិកដែលបានទទួលស្គាល់នូវស្នាដៃ និងការខិតខំប្រឹងប្រែងរបស់សម្ដេចក្នុងរយៈពេលជាង៤ទសវត្សរ៍កន្លងទៅនេះ។
ជាមួយគ្នានោះដែរ សម្ដេចតេជោ ក៏បានរៀបរាប់ថា ចាប់តាំងពីកម្ពុជាបានក្លាយ ជាសមាជិកទី១០នៃសមាគមប្រជាជាតិអាស៊ីអាគ្នេយ៍ (អាស៊ាន) ក្នុងឆ្នាំ១៩៩៩ កម្ពុជាត្រូវបានទទួលស្គាល់ថា ជាប្រទេសមួយដែលបានធ្វើសមាហរណកម្មយ៉ាង សកម្មទៅក្នុងតំបន់ និងពិភពលោកបានកសាងចំណងមិត្តភាព និងសហប្រតិបត្តិការល្អប្រសើរជាមួយបណ្តាប្រទេសនានា ហើយបានកំពុងចូលរួមបំពេញតួនាទីយ៉ាងសកម្មដោយស្មើសិទ្ធិ និងស្មើភាពក្នុងគ្រប់កិច្ចការអន្តរជាតិទាំងក្នុងក្របខណ្ឌតំបន់ និងពិភពលោក។
សម្ដេចតេជោ បន្ដថា ជាក់ស្ដែងកិច្ចខិតខំប្រឹងប្រែងក្នុងការដឹកនាំ និងរៀបចំកិច្ចប្រជុំកំពូលអាស៊ានដោយជោគជ័យនៅឆ្នាំ២០០២, ២០១២ និង២០២២ គឺជាមោទនៈភាពជាតិសម្រាប់កម្ពុជានៅលើឆាកអន្តរជាតិដែលបង្ហាញដល់ពិភព លោកអំពីស្មារតីរួមចំណែកដល់ការកសាងសហគមន៍អាស៊ាន និងពង្រឹងកិច្ចសហប្រតិបត្តិការពហុភាគី ដើម្បីសន្តិភាព ស្ថិរភាព, សន្តិសុខ និងការអភិវឌ្ឍប្រកបដោយចីរភាពនៅក្នុងសកលលោក និងតំបន់។
លើសពីនេះ សម្ដេចនាយករដ្ឋមន្ដ្រីលើកឡើងថា សម្រាប់ឆ្នាំ២០២២នេះ កម្ពុជា បានទទួលជាប្រធានអាស៊ានប្ដូរវេនជាលើកទី៣ ស្របពេលដែលតំបន់ និងសកលលោកកំពុងប្រឈមនឹងសម្ពាធពីគ្រប់ទិសទីរួមមាន ៖ ការប្រកួតប្រជែង ផ្នែកភូមិសាស្ត្រនយោបាយ, សង្គ្រាម, ជំងឺកូវីដ-១៩, វិបត្តិស្បៀងអាហារ និងថាមពល, និងការធ្លាក់ចុះនៃសេដ្ឋកិច្ចពិភពលោកក៏ទោះបីជួបប្រទះនូវបញ្ហាប្រឈមជាច្រើនក្តី, កម្ពុជាបានដឹកនាំនាវាអាស៊ានប្រកបដោយជោគជ័យក្រោមមូលបទ «អាស៊ានរួមគ្នាធ្វើ ៖ ដោះស្រាយបញ្ហាប្រឈមទាំងអស់គ្នា» ដែលបានឆ្លុះបញ្ចាំងអំពីការយកចិត្តទុកដាក់លើរបៀបវារៈសម្រាប់សន្តិភាព និងកិច្ចសហប្រតិបត្តិការ និងការព្យាយាមប្រមូលនូវកិច្ចខិតខំប្រឹងប្រែងរួម ដើម្បីកាត់បន្ថយផលប៉ះពាល់នៃការប្រឈមមុខដាក់គ្នារវាងប្រទេសមហាអំណាចធំៗ,បណ្ដុះទំនាក់ទំនងមិត្តភាព, ពង្រីកកិច្ចសហប្រតិបត្តិការជាក់ស្តែងទាំងសង្គម និងសេដ្ឋកិច្ច, កសាងទំនុកចិត្តជាមួយប្រទេសដៃគូ, និងជាពិសេស ដើម្បីជំរុញសមាហរណកម្មតំបន់ និងសម្រេចឱ្យបាននូវ«ចក្ខុវិស័យអាស៊ានឆ្នាំ២០២៥»៕
