(ភ្នំពេញ) ៖នៅថ្ងៃទី១១ ខែមករា ឆ្នាំ២០២៣នេះ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានអនុញ្ញាតឱ្យគណៈប្រតិភូក្រុមប្រទេសប៉ាស៊ីហ្វិក អំពីកិច្ចសហប្រតិបត្តិការអន្តរជាតិ (ICRG-JG) ដឹកនាំដោយលោកស្រី ម៉ាលីន វ៉ាន មន្ត្រីជាន់ខ្ពស់ផ្នែកវិភាគគោលនយោបាយ នៃលេខាធិការក្រុមការងារហិរញ្ញវត្ថុ ចូលជួបសម្ដែងការគួរសម។
ជាកិច្ចស្វាគមន៍ សម្ដេចក្រឡាហោម ស ខេង ក្នុងនាមជាប្រធានគណៈកម្មាធិការសម្របសម្រួលថ្នាក់ជាតិ ប្រឆាំងការសម្អាតប្រាក់ និងហិរញ្ញប្បទានភេរវកម្ម និងហិរញ្ញប្បទានអាវុធមហាប្រល័យ សម្ដេច សូមថ្លែងអំណរគុណ និងស្វាគមន៍យ៉ាងកក់ក្ដៅចំពោះដំណើរទស្សនកិច្ចដ៏មានសារៈសំខាន់របស់ គណៈប្រតិភូមកកាន់ព្រះរាជាណាចក្រកម្ពុជា នាឱកាសនេះ។
សម្ដេចក្រឡាហោម បានជម្រាបជូនគណៈប្រតិភូថា សម្ដេច សូមចូលរួមជាមួយ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា សូមបញ្ជាក់ជាថ្មីម្ដងទៀតនូវការប្ដេជ្ញាចិត្ត និងឆន្ទះដ៏មោះមុតរបស់កម្ពុជា ក្នុងការប្រយុទ្ធប្រឆាំង និងការសម្អាតប្រាក់ និងហិរញ្ញប្បទានភេរវកម្ម និងហិរញ្ញប្បទានអាវុធមហាប្រល័យ។ ជាក់ស្ដែងចាប់តាំងពីឆ្នាំ២០១៩ រហូតមកដល់ពេលនេះ គឺកម្ពុជា សម្រេចបាននូវសមិទ្ធផលសំខាន់ៗមួយចំនួន ទាំងក្នុងក្របខណ្ឌកសាងច្បាប់ លិខិតបទដ្ឋានគតិយុត្តបម្រើឱ្យការងារទាំងនេះ និងការអនុវត្តទៅនឹងកិច្ចការងារមួយចំនួន ដែលតម្រូវឱ្យខាងស្ថាប័នហិរញ្ញវត្ថុអន្ដរជាតិ។
សម្ដេចក្រឡាហោម ក៏បានជម្រាបជូនបន្ថែមដែរថា ទន្ទឹមនឹងការកសាងនូវលិខិតបទដ្ឋានគតិយុត្តបម្រើឱ្យកិច្ចការទាំងនេះ កម្ពុជា ក៏បានពិនិត្យ និងកែសម្រួល ព្រមទាំងពង្រឹងយន្តការដឹកនាំការងារនេះយ៉ាងសកម្មផងដែរ ទាំងយន្តការកម្រិតថ្នាក់ជាតិ គឺកម្រិតនយោបាយ ទាំងយន្តការកម្រិតបច្ចេកទេស ដោយក្នុងនោះបានរៀបចំជាអនុគណៈកម្មាធិការ ដែលមានសមត្ថកិច្ចទៅលើកិច្ចការពាក់ព័ន្ធទៅតាមវិស័យទទួលខុសត្រូវរៀងៗខ្លួន នៅក្នុងដែនសមត្ថកិច្ច ដែលពាក់ព័ន្ធទៅលើកិច្ចការងារប្រឆាំងការសម្អាតប្រាក់ និងហិរញ្ញប្បទានភេរវកម្ម និងហិរញ្ញប្បទានអាវុធមហាប្រល័យនេះ ហើយកម្ពុជា ក៏កំពុងតែខិតខំធ្វើយ៉ាងណា ដើម្បីពង្រឹងនូវយន្តការទាំងនេះ ព្រមទាំងពង្រីកនូវវិសាលភាពយន្តការទាំងនេះ ដើម្បីធ្វើយ៉ាងណាធានាដល់ប្រសិទ្ធិភាពការងារ ក៏ដូចនិរន្ដរភាពការងារនេះផងដែរ។
ក្រៅពីការងារកសាងលិខិតបទដ្ឋានគតិយុត្ត និងការរៀបចំ ក៏ដូចជាការងារពង្រឹងយន្តការដឹកនាំ និងអនុវត្ត ហើយកម្ពុជាបានចាត់ទុកកិច្ចការនេះ គឺជាកិច្ចការដល់សំខាន់ និងការងារអាទិភាព ហើយមកដល់ពេលនេះ បានចាត់តាំងធ្វើការផ្សព្វផ្សាយការងារប្រឆាំងការងារសម្អាតប្រាក់ ហរិញ្ញប្បទាន ភេរវកម្ម និងហិរញ្ញប្បទានអាវុធមហាប្រល័យ ជាបន្តបន្ទាប់សំដៅធ្វើយ៉ាងណា ផ្សព្វផ្សាយឱ្យមានការយល់ដឹងកាន់តែទូលំទូលាយ ក្នុងនោះក៏បានបណ្តុះបណ្តាលដល់ភាគីពាក់ព័ន្ធ ដើម្បីកៀរគរស្វែងរកការគាំទ្រនឹងការចូលរួម សំដៅធ្វើយ៉ាងណាចូលរួមអនុវត្តតាមច្បាប់ដែលមានចែងជាធរមាន។
ជាការឆ្លើយតប តំណាងគណៈប្រតិភូ ក៏បានថ្លែងអំណរគុណចំពោះ សម្តេចក្រឡាហោម ស ខេង ជាក្រុមការងារសម្របសម្រួលថ្នាក់ជាតិរបស់កម្ពុជា ដែលបានសម្តែងការស្វាគមន៍ ព្រមទាំងផ្តល់ការបដិសណ្ធារកិច្ចយ៉ាងកក់ក្តៅចំពោះគណប្រតិភូដែលអញ្ជើញមកព្រះរាជាណាចក្រកម្ពុជា។
លើសពីនេះ គណៈប្រតិភូ ក៏បានធ្វើការកោតសរសើរចំពោះភាពបើកទូលាយ និងការចូលរួមយ៉ាងល្អប្រសើររបស់ក្រុមការងារនៅកម្ពុជា។ ជាមួយគ្នានេះ គណៈប្រតិភូ ក៏បានសម្តែងការកោតសរសើរថា ក្នុងរយៈពេលកន្លងមកនេះ ថ្វីដ្បិតកម្ពុជាក៏ដូចជាប្រទេសនានានៅទូទាំងសកលោក ទទួលរងនូវផលប៉ះពាល់ដោយសារវិបត្តិ នៃជំងឺកូវីដ១៩យ៉ាងណាក៏ដោយ តែកម្ពុជាបានអនុវត្តតាមផែនការសកម្មភាពរបស់ខ្លួន ដោយផ្តល់របាយការណ៍ជាបន្តបន្ទាប់ រហូតឈានដល់ដំណើរទស្សនកិច្ច on side visit របស់គណប្រតិភូនាឱកាសនេះ។
ជាថ្មីម្តងទៀត សម្តេចក្រឡាហោម ស ខេង សូមថ្លែងអំណរគុណ និងស្វាគមន៍ចំពោះវត្តមានរបស់គណប្រតិភូនៅព្រះរាជាណាចក្រកម្ពុជា សម្តេចក្រឡាហោម ក៏សូមជូនពរដល់ដំណើរទស្សនកិច្ចរបស់គណប្រតិភូប្រព្រឹត្តទៅដោយជោគជ័យ ជាមួយគ្នានេះដែរ សម្តេចផ្ទាល់ក្នុងនាមជាប្រធានគណកម្មធិការសម្របសម្រួលថ្នាក់ជាតិ ក៏ដូចជាគណៈកម្មការ និងក្រុមការងារត្រៀមខ្លួនជានិច្ចក្នុងការផ្តល់កិច្ចសហប្រតិបត្តិការ ជានិច្ចតាមតម្រូវការចាំបាច់៕
