(ព្រះសីហនុ) ៖ នាវាទេសចរណ៍ខ្នាតធំ១គ្រឿងទៀត មានឈ្មោះ SEABOURN ENCORE សញ្ជាតិ Bahamas មានបណ្ដោយប្រវែង២១០ម៉ែត្រ ទទឹង២៨ម៉ែត្រ និងជម្រៅទឹក៦,៧០ម៉ែត្រ ផ្ទុកភ្ញៀវទេសចរចម្រុះជាតិសាសន៍ចំនួន៤២៩នាក់ និងនាវិក៤៣០នាក់បានចូលចតនៅកំពង់ផែស្វយ័ត ក្រុងព្រះសីហនុ នៅព្រឹកថ្ងៃទី១៤ ខែមករា ឆ្នាំ២០២៣នេះ ដើម្បីដាក់ភ្ញៀវទេសចរចុះទស្សនកិច្ចពីតំបន់មានសក្តានុពលធំៗក្នុងខេត្តព្រះសីហនុ។នេះបើយោងតាមក្រសួងទេសចរណ៍បានផ្សាយមុននេះ។
មន្ត្រីនគរបាលអន្តោប្រវេសន្តច្រកទ្វារកំពង់ផែក្រុងព្រះសីហនុ បានឱ្យដឹងថា នាវាទេសចរណ៍ខ្នាតយក្សនេះបានធ្វើដំណើរមកពីប្រទេសថៃចូលចតនៅកំពង់ផែស្វយ័តពេលធ្វើទេសចរណ៍នៅតាមតំបន់រមណីយដ្ឋាន និងទីប្រជុំជនសំខាន់ៗក្នុងខេត្តមុនចាកចេញទៅប្រទេសវៀតណាមនៅយប់ថ្ងៃដដែលនេះ។
នៅលើកនាវាខ្នាតយក្សនេះភ្ញៀវទេសចរ មានសញ្ជាតិច្រើនជាងគេ គឺជនជាតិអាមេរិកចំនួន២៥០នាក់, អង់គ្លេសចំនួន ៥០នាក់ និងអូស្ត្រាលីចំនួន ៥៤នាក់។
គួរបញ្ជាក់ថា នាវាទេសចរណ៍ខ្នាតយក្សចូលចតកំពង់ផែស្វយ័ត ក្រុងព្រះសីហនុ ជាលើកទី៣ ហើយដឹកភ្ញៀវទេសចរចម្រុះ ជាតិសាសន៍មកទស្សនាប្រទេសកម្ពុជា ក្រោយខកខានមួយរយៈដោយសារការរាំងស្ទះពីវិបត្តិជំងឺកូវីដ១៩ កន្លងមក៕សហការី
