(ភ្នំពេញ) ៖ យុវជនម្នាក់ខណៈកំពុងអង្គុយហូបបាយសុខៗ ស្រាប់តែដួលប្រកាច់ និងបានស្លា.ប់បាត់បង់ជីវិតភ្លាមៗ ហើយអ្នកដែលនៅហូបបាយជុំគ្នាអះអាងថា យុវជនខាងលើអួលបាយ ប៉ុន្តែនគរបាលបច្ចេកទេសពិនិត្យឃើញថា ការស្លា.ប់នេះបណ្ដាលមកពីជម្ងឺខ្យល់គ (គាំងបេះដូង)។
ហេតុការណ៍ខាងលើនោះបានកើតឡើងកាលពីវេលាម៉ោង១២និង៥៥នាទីថ្ងៃត្រង់ថ្ងៃទី២២ ខែឧសភា ឆ្នាំ២០២៣ នៅក្នុងបន្ទប់ជួលលេខ38E1 ជាន់ទី១ ស្ថិតនៅក្នុងភូមិព្រៃទា១ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។
តាមប្រភពព័ត៌មានបានដឹងថា យុវជនខាងលើឈ្មោះ ផា ភារ៉ូត អាយុ១៨ឆ្នាំ មុខរបរកម្មកររោងចក្រ ស្នាក់នៅបន្ទប់ជួលកើតហេតុ និងមានស្រុកកំណើតនៅភូមិវឌ្ឍនៈ ឃុំវឌ្ឍនៈ ស្រុកសំបូរ ខេត្តក្រចេះ ។ មានឳពុកឈ្មោះ ស៊ឹង ផា អាយុ៦៣ឆ្នាំ និងម្តាយឈ្មោះ ឡុង សេង អាយុ៥៤ឆ្នាំ មានបងប្អូនចំនួន៤នាក់ ប្រុស២នាក់ ស្រី២នាក់ ជនរងគ្រោះជាកូនពៅ ។
តាមប្រភពព័ត៌មានបានឲ្យដឹងថា នៅមុនកើតហេតុ ខណៈចេញពីធ្វើការរោងចក្រ យុវជនរងគ្រោះរូបនេះបានហូបបាយថ្ងៃត្រង់ជុំគ្នាជាមួយអ្នកស្នាក់នៅបន្ទប់ជាមួយ នៅក្នុងបន្ទប់ជួលកើតហេតុ។ពេលនោះក៏បានទិញស្រាបៀរមកហូបម្នាក់មួយកំប៉ុងផងដែរ ដោយហូបបាយបណ្តើរ ផឹកស្រាបៀរបណ្តើរ លុះបន្តិចក្រោយមក ក៏ស្រាប់តែជនរងគ្រោះ អួលបាយស្ទះខ្យល់ភ្លាមៗតែម្ដង។
តាមប្រភពដដែលបានប្រាប់ទៀតថា ខណៈនោះបង្កឲ្យមានការផ្អើលយ៉ាងខ្លាំង ហើយអ្នកជិតខាងបាននាំគ្នាជួយរឹត គក់ច្របាច់ ចេញបាយនិងស្រាបៀរមកវិញដែរ ប៉ុន្តែយុវជនរូបនោះនៅតែមិនអាចរស់បានឡើយ។
ក្រោយពេលកើតហេតុ ក៏បានរាយការណ៍ទៅសមត្ថកិច្ចចុះទៅពិនិត្យកោសល្យវិច័្ចយតាមជំនាញ ហើយនគរបាលបញ្ជាក់ថា ជនរងគ្រោះស្លា.ប់ដោយជម្ងឺខ្យល់គ ៕សហការី