(សៀមរាប) ៖នៅថ្ងៃសុក្រ ៦កើត ខែអស្សុជ ឆ្នាំថោះ បញ្ចស័ក ព.ស ២៥៦៧ ត្រូវនឹងថ្ងៃទី២០ ខែតុលា ឆ្នាំ២០២៣ សាលប្រជុំសាខាកាកបាទក្រហមកម្ពុជា ខេត្តសៀមរាប បានធ្វេីពិធីប្រកាសកែសម្រួលសេចក្តីសម្រេច និងតែងតាំងសមាសភាពគណៈកម្មាធិការអនុសាខាកាកបាទក្រហមកម្ពុជា ក្រុង-ស្រុក នៃខេត្តសៀមរាប ដែលដឹកនាំដោយ ឯកឧត្តម ប្រាក់ សោភ័ណ អភិបាល នៃគណៈអភិបាលខេត្តសៀមរាប ដោយមានការអញ្ជើញចូលរួមពីសំណាក់ឯកឧត្តម លោកជំទាវ អនុប្រធាន សមាជិក សមាជិកា នៃគណៈកម្មាធិការ សាខាកាកបាទក្រហមកម្ពុជាខេត្តលោកនាយក នាយករង ក្រុមមន្ត្រីប្រតិបត្តិសាខា ប្រធានកិត្តិយសអនុសាខាក្រុង-ស្រុកទាំង១២ ប្រធាន អនុប្រធាន អនុសាខាក្រុង-ស្រុកទាំង១២ ព្រមទាំងសមាជិក សមាជិកា នៅក្នុងអនុសាខាក្រុងស្រុកទាំង១២ ។
ក្នុងឱកាសនេះ ឯកឧត្តមអៅិបាលខេត្ត បានកោតសសើរខ្ពស់ ចំពោះ លោក លោកស្រី គណៈកិត្តិយស គណៈកម្មាធិការអនុសាខាកាកបាទក្រហមកម្ពុជាក្រុង-ស្រុកទាំងអស់ ដែលរយៈពេលកន្លងមក ពិសេសក្នុងអាណត្តិទី៥ ដែលមាន ឯកឧត្តម ទៀ សីហា ជាប្រធាន បានពុះពារបំពេញការងារយ៉ាងសកម្មរាល់ពេលមានគ្រោះមហន្តរាយតូចធំក្នុងស្រុក-ក្រុង តែងយកចិត្តទុកដាក់ដោះស្រាយ និងរាយការណ៍មកគណៈកម្មាធិការសាខាបានទាន់ពេលវលា ជាពិសេសបានសហការរួមគ្នា ជាមួយអាជ្ញាធរ កងកម្លាំង ស្ថាប័នពាក់ព័ន្ធ ចូលរួមយ៉ាងសកម្មបំផុត ក្នុងការទប់ស្កាត់ការរីករាលដាលជាសកលនៃជំងឺកូវីដ-១៩ កន្លងទៅនេះប្រកបដោយជោគជ័យ។
លើសពីនេះទៅទៀត ឯកឧត្តមអភិបាល បានសំណូមពរ សូមឱ្យគណៈកម្មាធិការអនុសាខាអំពាវនាវឱ្យចូលរួមពិនិត្យលើលទ្ធភាពជនដែលខ្វះខាតក្នុងរយៈពេលរដូវវស្សាដែលរងការប៉ះពាល់ពីគ្រោះជំនន់ទឹកភ្លៀងកន្លងមក និងត្រៀមផែនការទៅមុខ ដោយពិនិត្យទៅលើជនចាស់ជរាដែលមានជីវភាពទីទាល់ក្រខ្វះខាតនៅពេលរដូវរំហើយនាពេលខាងមុខនេះ យើងត្រូវត្រៀមសម្ភារៈមួយចំនួន ដើម្បីផ្គត់ផ្គង់ អាចជាអាវរងារជាដើម៕