(កំពង់ចាម) ៖ បន្ទាប់ពីទទួលបានរបាយការណ៍ពីអាជ្ញាធរមូលដ្ឋានស្រុកស្ទឹងត្រង់ នៅរសៀល ថ្ងៃទី៧ខែសីហា ឆ្នាំ២០២៤ នេះ ឯកឧត្តម អ៊ុន ចាន់ដា អភិបាល នៃគណៈអភិបាលខេត្តកំពង់ចាម បានដឹកនាំក្រុមការងារ អញ្ជើញចុះពិនិត្យស្ថានភាពបាក់ស្រុតច្រាំងទន្លេនៅចំណុចភូមិពាមក្រៅ ឃុំពាមកោះស្នា ស្រុកស្ទឹងត្រង។
ជាវិធានបន្ទាន់ដើម្បីរំសាយក្តីកង្វល់របស់អ្នកភូមិពាមក្នុង ឯកឧត្តមអភិបាលខេត្ត បានចាត់ឲ្យប្រធានមន្ទីរធនធានទឹក និងឧត្តុនិយម សហការជាមួយអាជ្ញាធរមូលដ្ឋាន និងអង្គភាពពាក់ព័ន្ធ សំដៅធ្វេីយ៉ាងណាទប់ស្កាត់ការបាក់ស្រុតច្រាំងជាបន្ត ដោយតម្រូវឲ្យប្រើបាវខ្សាច់ខ្នាតយក្ស ឬចាក់ថ្មទប់បន្ថែមដើម្បីគ្រិះរឹងមាំនៃច្រាំងទន្លេ ខណៈគ្រោះមហន្តរាយធម្មជាតិបាននិងកំពុងកើតឡើងឥតឈប់ឈរ។
គួរបញ្ជាក់ថា នៅក្នុងអំឡុងឆ្នាំ២០១៩ ចំណុចខាងលើនេះ ក៏ធ្លាប់បានរងការបាក់ស្រុត ហើយអាជ្ញាធរខេត្ត បានធ្វើការសហការជាមួយក្រសួងធនធានទឹក និងអង្កភាពពាក់ព័ន្ធ បានដាក់បាវខ្សាច់ខ្តាតយក្ស និងចាក់ថ្មទប់តាមច្រាំងទន្លេនៅចំណុចនេះជាច្រេីនធ្វើឲ្យគ្រឹះច្រាំងទន្លេមានភាពរឹងមាំជាច្រើនឆ្នាំ។ ប៉ុន្តែឆ្នាំនេះដោយស្ថានភាពអាកាសធាតុទឹកភ្លៀងមានការប្រែប្រួលផង ទឹកទន្លេបន្តហក់ឡេីង ហេីយកន្លែងខ្លះបន្តស្រុតបាក់ដីភូមិរបស់អ្នកស្រុកបន្ថែមទៀត ដូច្នោះអាជ្ញាធរខេត្ត និងមន្ត្រីជំនាញបន្តរកវិធានការបង្ការ ដើម្បីទប់ស្កាត់ការបាក់ស្រុតច្រាំងទន្លេនេះ ដើម្បីភាពសុខសាន្តរបស់ប្រជាជន៕
