(មណ្ឌលគិរី) ៖ យុវជនជនជាតិព្នងម្នាក់បានធ្វើអត្តឃាតចង.កនៅលើមែកឈើក្នុងចំការកាលពីរសៀលថ្ងៃទី២៥ ខែមេសា ឆ្នាំ២០២៤ នេះ ខណៈបានសន្យាក្នុងចិត្តថា បើមិនបានអ្នកមេម៉ាយកូន២ ធ្វើជាគូអនាគតទេសុខចិត្តស្លាប់ ទីបំផុតស្លាប់មែនដោយចងកសម្លាប់ខ្លួន ។ យុវជននោះមានឈ្មោះ ឡន គូល អាយុ១៨ឆ្នាំ ជនជាតិភ្នង សញ្ជាតិខ្មែរ មុខរបរជាកសិករ មានទីលំនៅភូមិពូចារ ឃុំប៊ូស្រា ស្រុកពេជ្រាដា ខេត្តមណ្ឌលគិរី ។
តាមការបំភ្លឺពីឈ្មោះ ឡន គា និងឈ្មោះ ឡន មិនា ត្រូវជាបងស្រីបង្កើតរបស់ជនរងគ្រោះឲ្យដឹងថា នៅវេលារសៀលថ្ងៃខែខាងលើ មេឃខ្មៅកំពុងរកកលចង់រកភ្លៀង នាងបានដើរទៅយកខោអាវហាលនៅខាងក្រោយផ្ទះក៏បានឃើញប្អូនប្រុសឈ្មោះឡន គូល ចងកនៅលើមែកឈើ«ដើមប័រ»កម្ពស់ពីដីជាង២ម៉ែត្រ ដោយខ្សែគោពណ៏ខៀវ ។
ឃើញដូច្នោះ បងស្រីក៏បានរត់ទៅប្រាប់បងជីដូនមួយឈ្មោះ ក្លិ ខិត ឲ្យទៅជួយកាត់ខ្សែទំលាក់មកដី ដើម្បីជួយធ្វើចលនាបេះដូង និងយកប្រេងកូឡាមករឹត និងចាប់ជីបចរមើលអត់មានចលនាទេ ពេលនោះប្អូនគាត់បានស្លាប់បាត់ទៅហើយ ។ បងស្រីជនរងគ្រោះទាំង២នាក់ រៀបរាប់ប្រហាក់ប្រហែលគ្នាទៀតថា កន្លងមកប្អូនរបស់គាត់បានស្រឡាញ់ស្ត្រីមេម៉ាយកូនពីរម្នាក់ តែឪពុកម្តាយខាងស្រីគេមិនឲ្យ ដោយសារប្អូនប្រុសជាមនុ ស្សប្រមឹកស្រាពេក ។
ហើយប្អូនប្រុសគាត់តែងតែនិយាយប្រាប់មិត្តភក្រ័របស់វាគេថា «ក្រមុំគគោកតែគេមិនត្រូវចិត្តទេ»ស្រឡាញ់តែអ្នកមេម៉ាយកូនពីរ បើមិនបានគ្នាធ្វើជាគូអនាគតទេ គេនិងសម្លាប់ខ្លួន ។ បងស្រី ឡន គា បានបញ្ជាក់ទៀតថា ជនរងគ្រោះឱ្យតែផឹកស្រាស្រវឹងតែងតែនិយាយថា ក្រមុំច្រើនគគោកតែខ្លួនមិនស្រឡាញ់ បែជាមកស្រឡាញ់មេម៉ាយកូនពីរទៅវិញ ។
ក្រោយកើតហេតុសមត្តកិច្ចកម្លាំងងសមត្តកិច្ចមូលដ្ឋាន បានបង្កើតគណកម្មការចុះពិនិត្យសាកសព ដោយបានធ្វើការសន្និដ្ឋានថា ជនរងគ្រោះពិតជាចងករសម្លាប់ខ្លួនប្រាកដមែន ។ បន្ទាប់មកសមត្តកិច្ចបានប្រគល់សាកសពជូនក្រុមគ្រួសារ និងសាច់ញាតិ ដើម្បីយកទៅធ្វើបុណ្យតាមប្រពៃណី ៕សហការី