(បាត់ដំបង) ៖ ក្រោយត្រឡប់មកពីចូលរួមបុណ្យបញ្ចុះខ័ណ្ឌសីម៉ាវិញ ស្រាប់តែម្ចាស់ផ្ទះបានផ្អើលឆោឡោឡើងនៅពេលឃើញទ្វារខាងក្រោយផ្ទះ ត្រូវចោរគាស់ធ្លុះធ្លាយ រីឯអីវ៉ាន់នៅក្នុងបន្ទប់ត្រូវបានគេរើកកាយ ជាមួយនឹងការបាត់បង់អស់នូវគ្រឿងអល័ង្ការ និងប្រាក់ ដែលគេសន្និដ្ឋានថា អាចត្រូវចោរគាស់ទម្លុះទម្លាយចូលលួចយក នៅវេលាម៉ោងប្រមាណ៧យប់ថ្ងៃទី២៦ មេសា នៅភូមិស្វាយកង់ ឃុំអន្លង់វិល ស្រុកសង្កែ ពេលដែលម្ចាស់រវល់ទៅលេងបុណ្យបញ្ចុះសីម៉ានៅខេត្តបន្ទាយមានជ័យ ។
សេចក្ដីរាយការណ៍បានឲ្យដឹងថា ម្ចាស់ផ្ទះរងគ្រោះឈ្មោះ រិន ណារិទ្ធ ភេទប្រុស អាយុ៣៨ឆ្នាំ មានមុខរបរលក់ដូរ រស់នៅចំណុចកើតហេតុ ។ ផ្ទះជនរងគ្រោះ ត្រូវជនមិនស្កាល់មុខគាស់ទ្វារខាងក្រោយចូលលួចគ្រឿងអល័ង្ការ និងប្រាក់អស់គ្មានសល់ នៅពេលគាត់ និងក្រុមគ្រួសាររវល់ទៅលេងបុណ្យបញ្ចុះខ័ណ្ឌសីម៉ា នៅខេត្តបន្ទាយមានជ័យ ហើយពេលត្រឡប់មកដល់ផ្ទះវិញទើបបានដឹង ក្រោយឃើញរបើកទ្វារខាងក្រោយរបើករបាញ និងស្នាមរើកកាយអីវ៉ាន់ និង បាត់ទ្រព្យសម្បត្តិអស់ពីក្នុងបន្ទប់។
បើតាមរបាយការណ៍ដែលសមត្ថកិច្ចបានស្រង់ពីម្ចាស់ផ្ទះ ទ្រព្យសម្បត្តិដែលបាត់បង់រួមមាន ១-ខ្សែកមាស០១ខ្សែទម្ងន់១,៣ជី មានតម្លៃ៣,០២០ដុល្លា ២,-ខ្សែកប្លាទីន០២ខ្សែតម្លៃ៧៥០ដុល្លា ៣- កងដៃប្លាទីនចំនួន០១ តម្លៃ៣០០ដុល្លា ៤-ប្រាក់ខ្មែរចំនួន១,៦លានរៀល ។ នាយប៉ុស្ដិ៍នគរបាល រដ្ឋបាលឃុំអន្លង់វិល លោក ក្រូច ណារ៉ុង បានប្រាប់កោះសន្តិភាពថា នៅយប់កើតហេតុ ម្ចាស់ផ្ទះមិនបាននៅទេ គឺ បិទទ្វារចាក់សោរ ហើយនាំគ្នាទៅលេងបុណ្យបញ្ជុះខ័ណ្ឌសីម៉ា នៅខេត្តបន្ទាយមានជ័យ តែគាត់បានដឹងថា ចោរគាស់ផ្ទះចូលលួចទ្រព្យសម្បត្តិ នៅពេលក្រុមគ្រួសារនេះត្រឡប់មកដល់ផ្ទះវិញ។
លោកថា នៅពេលដឹងថា ចោរគាស់ផ្ទះចូលលួចទ្រព្យសម្បត្តិ ជនរងគ្រោះក៏បានរាយការណ៍ប្រាប់សមត្ថកិច្ចភ្លាមៗដែរ។ លោក មេប៉ុស្ដិ៍រូបនេះបានបញ្ជាក់ថា នៅផ្ទះជនរងគ្រោះក៏មានបំពាក់កាមេរ៉ាសុវត្ថិភាពដែរ តែត្រូវជនមិនស្គាល់មុខ(ចោរ) កាត់ខ្សែបំផ្លាញចោលទាំងអស់មុនពេលចូលធ្វើសកម្មភាព។
លោក ក្រូច ណារ៉ុង បានបញ្ជាក់បន្ថែមថា កម្លាំងជំនាញបានចុះត្រូតពិនិត្យកន្លែងកើតហេតុរួចហើយ តែនៅមិនទាន់អាចធ្វើការសន្និដ្ឋានអំពីមុខសញ្ញាជនដៃដល់នៅឡើយទេ ព្រោះកំពុងធ្វើការស្រាវជ្រាវ និងស៊ើបអង្កេតនៅឡើយ ៕ដោយ ព្រំ ហន