(កំពង់ចាម) ៖ អភិបាលនៃគណៈអភិបាលខេត្តំពង់ចាម ឯកឧត្តម អ៊ុន ចាន់ដា បានថ្លែងថា នៅវិទ្យាស្ថានបណ្តុះបណ្តាលវិជ្ជាជីវៈ ខេត្តកំពង់ចាមនឹងរៀបចំបណ្តុះបណ្តាលយុវជនយើងនៅលើជំនាញចំនួន ៧ និងផ្តល់ការសិក្សាដល់ យុវជនចំនួន ៤២០នាក់។ ថ្លែងយ៉ាងដូច្នេះក្នុងកិច្ចប្រជុំផ្សព្វផ្សាយកម្មវិធីបណ្តុះបណ្តាលវិជ្ជាជីវៈ និងបច្ចេកទេសសម្រាប់យុវជនមកពីគ្រួសារក្រីក្រ និងគ្រួសារងាយរងហានិភ័យ នាព្រឹកថ្ងៃទី២៤ ខែវិច្ឆិកា ឆ្នាំ២០២៣ ។
ក្នុងឱកាសនោះដែរ ឯកឧត្តម អ៊ុន ចាន់ដា អភិបាលខេត្តកំពង់ចាម បានថ្លែងថា ក្រោមការដឹកនាំរបស់សម្តេចមហា បវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានដាក់ចេញកម្មវិធីបណ្តុះប ណ្តាលវិជ្ជាជីវៈ និងបច្ចេកទេស សំដៅធ្វើឱ្យយុវជនមកពីគ្រួសារក្រីក្រ និងគ្រួសារងាយរងហានិភ័យ មានជីវភាពល្អប្រសើរឡើង ដោយរក្សាបាននូវស្ថិរភាពការងារ កំណើន ផលិតភាព ប្រាក់ចំណូលសមរម្យ លក្ខខណ្ឌការងារល្អប្រសើរ និងចាកផុតពីបន្ទាត់នៃភាពក្រីក្រ ។
ឯកឧត្ដមអភិបាលខេត្ត បានបន្តថា តាមរយៈកម្មវិធីនេះខេត្តកំពង់ចាម ទទួលបានបានការបណ្តុះបណ្តាលវិជ្ជាជីវៈ និងបច្ចេកទេស នៅវិទ្យាស្ថានបណ្តុះបណ្តាលបច្ចេកទេស និងវិជ្ជាជីវៈខេត្ត ដោយមិនបង់ថ្លៃសិក្សា ព្រមទាំងទទួលបាននូវប្រាក់ឧបត្ថម្ភ ប្រចាំខែ ២៨ម៉ឺនរៀល ។ ក្រោយពីបញ្ចប់ការសិក្សា យុវជនយើងនឹងទទួលបានចំណេះ និងជំនាញមួយពិតប្រាកដ ដើម្បីប្រកបរបបចិញ្ចឹមជីវិត បង្កើនប្រាក់ចំណូលក្នុងគ្រួសារ បញ្ចៀសបាននូវការធ្វើចំណាកស្រុកដោយខុសច្បាប់ ផងដែរ ។
បេីតាមលោក ហាវ ធិន នាយកវិទ្យាស្ថានពហុបច្ចេកទេសខេត្តកំពង់ចាម បានឱ្យដឹងថា ក្រុមគោលដៅអាទិភាពទី១៖ យុវជនដែលមានអាយុចាប់ពី ១៥ឆ្នាំឡើង មកពីគ្រួសារក្រីក្រ និងគ្រួសារ ងាយរងហានិភ័យនៅទូទាំងប្រទេស។ ក្រុមគោលដៅអាទិភាពទី២៖ បុគ្គលនៃសេដ្ឋកិច្ចក្រៅប្រព័ន្ធ និងក្នុងប្រព័ន្ធ អំពីឳកាសបណ្តុះបណ្តាល និងចុះឈ្មោះចូលរៀនកម្មវិធីបណ្តុះបណ្តាលនេះ ប៉ុន្តែមិនទទួលបានប្រាក់ឧបត្ថម្ភ។
លោក ហាវ ធិន បានបញ្ជាក់ថា យុវជនគោលដៅនឹងទទួលបានអត្ថប្រយោជន៍ដូចជា៖ ១-សិក្សាដោយមិនបង់ថ្លៃ ២-ប្រាក់ឧបត្ថម្ភប្រចាំខែ ចំនួន ២៨ម៉ឺនរៀលក្នុង១ខែ ដោយសិក្សាពេញម៉ោង (សរុបចំនួន ១. ១២០ .០០០៛ /វគ្គ) ៣-ផ្តល់ប្រឹក្សាយោបល់ ពីការជ្រើសរើសជំនាញ និងព័ត៌មានទីផ្សារការងារ ៤-កន្លែងចុះកម្មសិក្សានៅតាមសហគ្រាស គ្រឹះស្ថាន ឧស្សាហកម្ម និងក្រុមហ៊ុនឯកជន ៥-សញ្ញាបត្របច្ចេកទេស និងវិជ្ជាជីវៈ១ និងឳកាសបន្តការសិក្សា ៦-ជំនាញមួយ ពិតប្រកដដែលទីផ្សារការងារកំពុងត្រូវការ និង៧ -ឳកាសការងារធ្វើសមរម្យ និងចំណូលទៀងទាត់ផងដែរ ៕
