(បាត់ដំបង) :លោកវរសេនីយ៍ឯក ឈឿន គឹមសុង ការិយាល័យនគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តបាត់ដំបង ។
👉 ដោយអនុវត្តន៍តាមការណែនាំបញ្ជាផ្ទាល់ពី ឯកឧត្ដមឧត្ដមសេនីយ៍ទោ សាត គឹមសាន ស្នងការ នៃស្នងការដ្ឋាននគរបាលខេត្តបាត់ដំបង ក៏ដូចជា លោកវរសេនីយ៍ឯក លឹម ពុទ្ធីឡា ស្នងការរង ផែនការងារនគរបាលព្រហ្មទណ្ឌ និង មានការសម្របសម្រួលទៅលេីនីតិវិធីពី ឯកឧត្ដម កែវ សុជាតិ ព្រះរាជអាជ្ញា នៃអយ្យការអមសាលាដំបូងខេត្តបាត់ដំបង នៅថ្ងៃទី ១៩ ខែ មករា ឆ្នាំ ២០២២ នៅចំណុចរង្វង់មូលសេះហោះ ស្ថិតក្នុងភូមិព្រែកមហាទេព សង្កាត់ស្វាយប៉ោ ក្រុងបាត់ដំបង ខេត្តបាត់ដំបង លោកវរសេនីយ៍ឯក ឈឿង គឹមសុង នាយការិយាល័យនគរបាលព្រហ្មទណ្ឌកម្រិតស្រាល បានដឹកនាំកម្លាំងការិយាល័យជំនាញ រួមនឹងក្រុមអន្តរាគមន៍ បង្ការ បង្ក្រាប ចុះប្រតិបត្តិការ បង្ក្រាប ករណី រំលោភលេីទំនុកចិត្ត ( យកម៉ូតូ តាមបណ្ដាញសង្គមហ្វេសប៊ុក ) ០១ ករណី និងបានធ្វេីការនាំខ្លួនជនសង្ស័យ ០១ នាក់ ឈ្មោះ ជា ពិសិត ភេទប្រុស អាយុ ៣៧ ឆ្នាំ មានទីលំនៅសង្កាត់ទឹកថ្លា ខណ្ឌសែនសុខ រាជធានីភ្នំពេញ ។
👉 កាលពីថ្ងៃទី ២៤ ខែ ធ្នូ ឆ្នាំ ២០២១ ជនរងគ្រោះ ឈ្មោះ សឺន សាម៉ៃ ភេទស្រី អាយុ ២៩ ឆ្នាំ មានទីលំនៅភូមិដាំស្ពៃ សង្កាត់ស្លាកែត ក្រុងបាត់ដំបង ខេត្តបាត់ដំបង បានស្គាល់ជនសង្ស័យខាងលេីតាមបណ្តាញសង្គមហ្វេសប៊ុក ដោយជនសង្ស័យបានសួរនាំជនរងគ្រោះជារបៀបញ៉ែ ហេីយជនសង្ស័យក៏បានប្រាប់ទៅជនរងគ្រោះថាគេជាគ្រូពេទ្យទាហានប្រចាំការនៅភ្នំពេញ រហូតដល់ថ្ងៃកេីតហេតុខាងលេី ជនសង្ស័យបានប្រាប់ទៅជនរងគ្រោះថា យកថ្នាំវាក់សាំងដូសទី ៣ មកខេត្តបាត់ដំបង រហូតដល់វេលាម៉ោង ១៣:០០ នាទី ជនសង្ស័យបានខលទៅជនរងគ្រោះតាមបណ្តាញសង្គមហ្វេសប៊ុក ថាខ្លួនមកដល់ខេត្តបាត់ដំបងហេីយ នៅមុខមន្ទីរពេទ្យបង្អែកខេត្ត ពេលនោះជនរងគ្រោះក៏បានជិះម៉ូតូ ម៉ាក ហុងដា PCX ពណ៌ ស ស៊េរីឆ្នាំ ២០១៨ ពាក់ស្លាកលេខបាត់ដំបង 1AD-6850 ចេញពីផ្ទះមករកទិញថ្នាំលេបផង ក៏មកជួបជនសង្ស័យនៅចំណុចមុខពេទ្យ នៅពេលជួបគ្នាជនសង្ស័យបានប្រាប់ជនរងគ្រោះថារូបគេមិនទាន់បានហូបបាយទេ ដោយអោយជនរងគ្រោះជូនទៅរកកន្លែងហូបបាយ នៅពេលដល់កន្លែងហូបបាយ មានគេខលតាមទូរស័ព្ទថាអោយជនសង្ស័យទៅយកថ្នាំ ពេលនោះជនសង្ស័យក៏បានខ្ចីសោរម៉ូតូរបស់ជនរងគ្រោះជិះទៅយកថ្នាំ ដោយជិះសំដៅទៅខាងពេទ្យធំវិញ រហូតដល់ប្រហែល១០ នាទីក្រោយមិនឃេីញជនសង្ស័យមកវិញទេីបជនរងគ្រោះសម្រេចចិត្តមកដាក់ពាក្យបណ្ដឹងនៅស្នងការដ្ឋាននគរបាលខេត្តបាត់ដំបង ។
👉 នៅចំពោះមុខសមត្ថកិច្ច ជនសង្ស័យ បានឆ្លេីយ សារភាពថាកន្លងមកខ្លួនធ្លាប់បានធ្វេីសកម្មភាព ដូចខាងលើ ចំនួន ០៤ លេីកមកហេីយ គឺ នៅក្នុងខេត្តឧត្តរមានជ័យចំនួន ០២ លេីក និង នៅក្នុងខេត្តពោធិ៍សាត់ចំនួន ០២ លេីក
📍 វត្ថុតាងដកហូតរួមមាន ៖
- កូនសោរម៉ូតូ ចំនួន ០៥
- ស៊ីមកាតចំនួន ០៤
- បណ្ណ័បេីកបរចំនួន ០១ សន្លឹក
- ស្លាកលេខម៉ូតូចំនួន ០៧ សន្លឹក
- ម៉ូតូ ០១គ្រឿងម៉ាកហុងដា ស្កុបពី ពណ៌ ស ស៊េរីឆ្នាំ ២០២២ ពាក់ស្លាកលេខ សៀមរាប 1AK-2419
– ម៉ូតូ ០១ គ្រឿងម៉ាក ហុងដាឌ្រីម សេ ១២៥ ពណ៌ ខ្មៅ ស៊េរីឆ្នាំ ២០២២ គ្មានស្លាកលេខ
បច្ចុប្បន្នការិយាល័យជំនាញកំពុងតែធ្វេីការកសាងសំណុំរឿងដេីម្បីបញ្ជូនទៅសាលាដំបូងខេត្តបាត់ដំបងចាត់ការបន្តតាមនីតិវិធី ។