ស្រុកស៊ីធរកណ្ដាល៖ រសៀលថ្ងៃទី២៥ ខែធ្នូ ឆ្នាំ២០២២ លោក យឹម យូគង់ ប្រធានគណៈកម្មាធិការអនុសាខាកាកបាទក្រហមកម្ពុជាស្រុកស៊ីធរកណ្ដាល និងសហការី បានចុះសាកសួរសុខទុក្ខ និងនាំយកអំណោយមនុស្សធម៌ផ្ដល់ជូនគ្រួសាររងគ្រោះដោយភ្លើងឆេះផ្ទះ ចំនួន០១គ្រួសារ ស្ថិតនៅក្នុងភូមិបាប្រិយ៍ ឃុំព្រែកចង្ក្រាន ស្រុកស៊ីធរកណ្តាល ខេត្តព្រៃវែង កាលពីវេលាម៉ោង ០១ និង ៣០នាទីរសៀល ថ្ងៃទី២៥ ខែធ្នូ ឆ្នាំ២០២២។
នាឱកាសនោះ លោកប្រធានគណៈកម្មាធិការអនុសាខាស្រុក បានពាំនាំប្រសាសន៍ផ្តាំផ្ញើសាកសួរសុខទុក្ខ ពីសំណាក់ ឯកឧត្តម ជា សុមេធី ប្រធានគណៈកម្មាធិការសាខាកាកបាទក្រហមកម្ពុជា ខេត្តព្រៃវែង ពិសេស ឯកឧត្តមនាយឧត្តមសេនីយ៍ សន្តិបណ្ឌិត នេត សាវឿន ប្រធានកិត្តិយសសាខាកាកបាទក្រហមកម្ពុជា ខេត្តព្រៃវែង ដែលជានិច្ចកាល លោកតែងតែគិតគូរដល់សុខទុក្ខប្រជាពលរដ្ឋដែលជួបការលំបាកបែបនេះ ស្របតាមពាក្យស្លោក “ទីណាមានទុក្ខលំបាក ទីនោះមានកាកបាទក្រហមកម្ពុជា” និង “កាកបាទក្រហមកម្ពុជាមានគ្រប់ទីកន្លែង សម្រាប់គ្រប់ៗគ្នាមិនទុកនរណាម្នាក់ចោល” ។ ជាមួយគ្នានេះ លោកប្រធាន ក៏សូមអំពាវនាវដល់បងប្អូនប្រជាពលរដ្ឋទាំងអស់មេត្តា បង្កើនការប្រុងប្រយ័ត្នអោយបានខ្ពស់ដើម្បីចៀសវៀងកុំអោយជួបប្រទះនូវគ្រោះមហន្តរាយបែបនេះទៀត ដោយមិនត្រូវដុតទៀនធូបទុកចោល ឬមានការធ្វេសប្រហែសជាមួយនិងវត្ថុទាំងឡាយណាដែលអាចបង្ករអោយមានជាអគ្គីភ័យនោះឡើយ និងសូមខិតខំថែរក្សាសុខភាពឲ្យបានល្អដោយប្រកាន់ភ្ជាប់នូវអនាម័យ រស់នៅស្អាត ហូបស្អាត ផឹកស្អាត និងគោរពអនុវត្តតាមវិធានការនានារបស់រាជរដ្ឋាភិបាល ក្រសួងសុខាភិបាល ជាពិសេស សូមបន្តអនុវត្តឲ្យបានខ្ជាប់ខ្ជួននូវវិធានការការពារខ្លួនពីជំងឺកូវីដ-១៩គឺ ៣ការពារ និង ៣កុំ របស់ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន នាយករដ្ឋមន្ត្រី និងចូលរួមចាក់វ៉ាក់សាំងអោយបានគ្រប់ៗគ្នា និងបានគ្រប់ដូស។
សម្ភារៈផ្តល់ជូនគ្រួសាររងគ្រោះរួមមាន៖ អង្ករ ៥០គ.ក ទឹកសុទ្ធ១កេស មី១កេស ទឹកត្រី១យួរ ទឹកស៊ីវអ៉ីវ១យួរ ត្រីខ១យួរ ប្រេងឆា១ដបធំ សម្ភារៈផ្ទះបាយ២ឈុត សម្ភារៈដំណេក២ឈុត និងថវិកា ២០០,០០០ រៀល។ ក្រុមកាកបាទក្រហមឃុំព្រែកចង្ក្រាន ចូលរួមបន្ថែមនូវ អង្ករ ២៥គ.ក និងថវិកាចំនួន ១០០,០០០ រៀល។