(ភ្នំពេញ) ៖ កម្លាំងការិយាល័យប្រឆាំងការជួញដូរមនុស្ស និងការពារអនីតិជនបានសហការជាមួយអាជ្ញាធរមូលដ្ឋាន ចុះបង្ក្រាបជាក់ស្តែងនូវករណីប្រព្រឹត្តិអំពើសញ្ចារកម្ម មានស្ថានទម្ងន់ទោស លួចបើកហាងម៉ាស្សា រួចបង្កប់បំរើសេវាកម្សាន្ត ដោយបានឃាត់ខ្លួនម្ចាស់ទីតាំងម្នាក់ រួមនឹងនារីរងគ្រោះចំនួន៨នាក់ ក្នុងនោះមានអនីតិជនចំនួ០៣នាក់ផងដែរ និងដកហូតបានវត្ថុតាងស្រោមអនាម័យប្រើប្រាស់រួចមួយចំនួន និងមិនទាន់ប្រើប្រាស់មួយចំនួន បង្កឱ្យមានការភ្ញាក់ផ្អើលកាលពីវេលាម៉ោង០៩និង១០នាទីយប់ ថ្ងៃទី១៧ ខែមករា ឆ្នាំ២០២៣ នៅចំណុចហាងម៉ាស្សាកោសជប់យីហោ «៩៩៩៩» នៅចំណុចផ្ទះគ្មានលេខ ស្ថិតចុងស្ពានព្រែកព្នៅខាងលិច ផ្លូវវិមានឈ្នះឈ្នះ ក្នុងភូមិឡកំបោរ សង្កាត់ស្វាយប៉ាក ខណ្ឌឬស្សីកែវ។
ដោយមានការចង្អុលបង្ហាញពីឯកឧត្តមឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ និងលោកឧត្តមសេនីយ៍ទោ ចាន់ កិត្តិខុម ស្នងការរងទទួលផែនប្រឆាំងការជួញដូរមនុស្ស និងការពារអនីតិជន នៃស្នងការដ្ឋាននគរបាលរាជធានីភ្នំពេញ និងក្រោមការសម្របសម្រួលដោយលោក សិត វណ្ណៈ ព្រះរាជអាជ្ញារងអយ្យការអមសាលាដំបូងរាជធានីភ្នំពេញ ព្រមទាំងលោកវរសេនីយ៍ទោ ហាក់ លី នាយការិយាល័យ បានដឹកនាំបញ្ជាផ្ទាល់ធ្វើការឃាត់ខ្លួនស្ត្រីម្នាក់ដែលជាម្ចាស់ទីតាំង និងនារីរងគ្រោះក្មេងៗចំនួន០៨នាក់ ។
សម្ថតកិច្ចបានប្រាប់អោយដឹងថា ស្ត្រីជាម្ចាស់ទីតាំងខាងលើនេះមានឈ្មោះ សេក មុំ អាយុ៤០ឆ្នាំ ស្នាក់នៅផ្ទះគ្មានលេខ ផ្លូវវិមានឈ្នះឈ្នះ ស្ថិតក្នុងភូមិឡកំបោរ សង្កាត់ស្វាយប៉ាក ខណ្ឌឬស្សីកែវ។
ប្រភពដដែលបានឲ្យដឹងថា ទីតាំងហាងម៉ាស្សាកោសជប់ខាងលើនេះយីហោ «៩៩៩៩» ដែលមានស្ត្រីម្នាក់ជាម្ចាស់ទីតាំង ហើយនៅក្នុងហាងនោះមានស្រីៗរង់ចាំទទួលភ្ញៀវម៉ាស្សា និងរួមភេ.ទចំនួន៨នាក់ ក្នុងនោះសង្ស័យនារីជាអនីតិជនចំនួន០៣នាក់ និងមានបន្ទប់សម្រាប់សេវាកម្សាន្តចំនួន៤បន្ទប់។ ចំណែកតម្លៃម៉ាស្សាធម្មតា ២.០០០០រៀលក្នុងមួយម៉ោង ចំពោះតម្លៃនៃការរួមភេ.ទវិញក្នុងមួយដងចាប់ពី ២០ដុល្លារ ទៅ ២៥ដុល្លារ ហើយលុយដែលបានមកពីការរួមភេ.ទទាំងអស់នេះ គឺម្ចាស់ទីតាំងចែកស្មើគ្នាជាមួយនារីៗម៉ាស្សាទាំងនោះផងដែរ។
ប្រភពដដែលបន្តថា ចំពោះហាងម៉ាស្សាខាងលើនេះ គឺចាប់បើកដំណើរការរកស៊ីទទួលភ្ញៀវចាប់ពីម៉ោង០៥ល្ងាច រហូតដល់យប់អធ្រាត្រទើបបិទទ្វារ រីឯនារីដែលសង្ស័យជាអនីតិជនចំនួន៣នាក់វិញ គឺចូលមកបម្រើការងារចាប់ពីម៉ោង០៧យប់ រហូតដល់ម៉ោង០៩យប់ផងដែរ។
ក្រោយប្រតិបត្តិការចប់ កម្លាំងជំនាញបាននាំខ្លួនស្ត្រីជាម្ចាស់ទីតាំងទៅកាន់ការិយាល័យប្រឆាំងការជួញដូរមនុស្ស និងការពារអនីតិជន ដើម្បីសួរនាំកសាងសំណុំរឿងចាត់ការតាមនីតិវិធី។ ហើយចំពោះនារីរងគ្រោះទាំង០៨នាក់វិញ ត្រូវបានប្រគល់ជូនទៅមន្ទីរសង្គមកិច្ចរាជធានីភ្នំពេញ ដើម្បីធ្វើការអប់រំផងដែរ៕សហការី