(ភ្នំពេញ) ៖ រថយន្តទ្រុងឃ្លុបបិទជិតមួយគ្រឿងពុំដឹងថាអ្នកបើកបរប្រញាប់ទៅណា ឬស្រវឹងទាំងថ្ងៃនោះទេ បានបើកបរក្នុងល្បឿនលឿន ហើយបានកៀរក្មេងប្រុសសិស្សសាលាម្នាក់ដែលកំពុងជិះម៉ូតូ បណ្ដាលឲ្យដួលរួចបែ.កក្បាលស្លា.ប់ភ្លាមៗនៅនឹងកន្លែង ។ បន្ទាប់មករថយន្តបង្កនេះពុំបានឈប់ទទួលខុសត្រូវនោះទេ បានព្យាយាមបើករត់គេចចម្ងាយប្រមាណជិត១គីឡូម៉ែត្រក៏ត្រូវបានកម្លាំងនគរបាលប៉ុស្តិ៍ចោមចៅទី៣ឃាត់បានទាំងរថយន្តនិងមនុស្ស។
ហេតុការណ៍ខាងលើនេះបានបង្កការភ្ញាក់ផ្អើលកើតឡើងកាលពីវេលាម៉ោង១២និង១៥នាទីរសៀល ថ្ងៃទី១៣ ខែកក្កដា ឆ្នាំ២០២៣ នៅតាមផ្លូវQMI កែងផ្លូវជាតិលេខ៤ ស្ថិតនៅក្នុងភូមិជម្ពូវ័ន១ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
ក្មេងប្រុសដែលរងគ្រោះរហូតបាត់បង់ជីវិតឈ្មោះ មុំ ម៉ាជូលី អាយុ១៤ឆ្នាំ ជាសិស្សរៀនថ្នាក់ទី៩ មានទីលំនៅសង្កាត់ទឹកល្អក់១ ខណ្ឌទួលគោក រាជធានីភ្នំពេញ មានឪពុកឈ្មោះ មុំ សុផល មុខរបរជាវេជ្ជបណ្ឌិត និងម្តាយឈ្មោះ ប៊ុន រ៉ាឌីកា មុខរបរជាគ្រូពេទ្យ ។
Picture
អ្នកឃើញហេតុការណ៍បាននិយាយថា នៅមុនពេលកើតហេតុ ជនរងគ្រោះជិះម៉ូតូម៉ាកហុងដាស្កូបពី១គ្រឿងពណ៌ក្រហម ពាក់ស្លាកលេខ ភ្នំពេញ 1CM-4236 តែម្នាក់ឯងដោយមានស្ពាយកាតាបរៀន១ផង ធ្វើដំណើរតាមផ្លូវQMI ក្នុងទិសដៅពីជើងទៅត្បូង ។ លុះពេលទៅដល់ត្រង់ចំណុចកើតហេតុ ស្រាប់តែរថយន្តទ្រុងឃ្លុបបិទជិត១គ្រឿងម៉ាកហ៊ីយ៉ាន់ដាយ ពណ៌បៃតង ពាក់ស្លាកលេខ ភ្នំពេញ 3G-32632 បើកស្របទិសគ្នាក្នុងល្បឿនលឿននោះលឿន ដោយពុំដឹងជាប្រញាប់ទៅណា ឬស្រវឹងទាំងថ្ងៃនោះទេ។
តាមប្រភពដដែលបានប្រាប់ឲ្យដឹងបន្តទៀតថា បន្ទាប់មកបានវ៉ាជែងម៉ូតូក្មេងប្រុសរងគ្រោះពីក្រោយរួចកៀរ បណ្ដាលឲ្យខ្ទា.តចូលក្រោមកង់រថយន្តកិ.នជនរងគ្រោះបែ.កខ្ទេ.ចក្បាលស្លា.ប់ភ្លាមៗនៅនឹងកន្លែង ។ បន្ទាប់មករថយន្តបង្កខាងលើបានព្យាយាមបើករត់គេចតាមផ្លូវជាតិលេខ៤ ឆ្ពោះទៅខាងស្ពានអាកាសចោមចៅ ប៉ុន្តែខណៈពេលទៅដល់ដល់មុខប៉ុស្តិ៍ចោមចៅទី៣ ក៏ត្រូវបានកម្លាំងនគរបាលប៉ុស្តិ៍នេះឃាត់បានទាំងរថយន្តនិងអ្នកបើកបរតែម្ដង ។ បន្ទាប់មកបានប្រគល់ជូននគរបាលការិយាល័យចរាចរផ្លូវគោកនៃស្នងការដ្ឋានរាជធានីភ្នំពេញនាំយកទៅរក្សាទុកកសាងសំណុំរឿងចាត់ការតាមច្បាប់ ៕សហការី