(ភ្នំពេញ) ៖ នាថ្ងៃពុធ ទី១៤ ខែធ្នូ២០២២ នេះឯកឧត្តម ឌិត ទីណា រដ្ធមន្ដ្រីក្រសួងកសិកម្ម រុក្ខាប្រមាញ់ និងនេសាទ បានទទួលស្វាគមន៍ក្រុមការងារក្រសួងបរិស្ថាន ដែលអញ្ជើញមកធ្វើបទបង្ហាញអំពីផែនការរបស់រាជរដ្ឋាភិបាល សម្រាប់បងប្អូនប្រជាពលរដ្ឋដែលត្រូវផ្លាស់ទីលំនៅចេញពីតំបន់រមណីយដ្ឋានអង្គរ ទៅនៅភូមិធម្មជាតិរុនតាឯក និងឃុំពាក់ស្នែង ក្នុងស្រុកបន្ទាយស្រី ខេត្តសៀមរាប។
ក្រៅពីការរៀបចំដីឡូត៍លំនៅដ្ឋានចំនួន១២ ០០០ឡូត៍ និងផែនការកសាងហេដ្ឋារចនាសម្ព័ន្ធរូបវ័ន្ត ដេីម្បីអភិវឌ្ឍតំបន់នេះជាទីក្រុង រាជរដ្ឋាភិបាលមានគម្រោងដាំឈើហូបផ្លែ ដំណាំបន្ទាប់បន្សំ និងសួនបន្លែ នៅតាមដីឡូត៍នីមួយៗ ដេីម្បីជួយគាំទ្រជីវភាពគ្រួសារ ព្រមទាំងដាំឈើលម្អនៅសងខាងផ្លូវក្នុងតំបន់នេះ ជូនបងប្អូនផងដែរ។ ការងារនេះបានចាប់ផ្តេីមជាបណ្តេីរៗ និងគ្រោងបន្តអនុវត្តរហូតចប់សព្វគ្រប់ នៅក្នុងឆមាសទី២ ឆ្នាំ២០២៣ខាងមុខ។
ក្រសួងកសិកម្ម រុក្ខាប្រមាញ់ និងនេសាទផ្តល់ការគាំទ្រពេញលេញចំពោះគោលនយោបាយរបស់រាជរដ្ឋាភិបាល និងត្រៀមលក្ខណ:រួចជាស្រេចដេីម្បីចូលរួមសហការអនុវត្ត។ ឯកឧត្តមរដ្ធមន្ដ្រីកសិកម្ម បានជំរុញឱ្យមានកិច្ចសហប្រតិបត្តិការកាន់តែជិតស្និទ្ធ និងល្អប្រសេីរថែមទៀត ជាមួយក្រសួងស្ថាប័នពាក់ព័ន្ធ ដូចជា ក្រសួងរៀបចំដែនដី នគរូបនីយកម្ម និងសំណង់ ក្រសួងបរិស្ថាន និងរដ្ឋបាលខេត្តសៀមរាប ទៅតាមសមត្ថភាព និងលទ្ធភាពរបស់ក្រសួងស្ថាប័ននីមួយៗ សំដៅបន្តចូលរួមជំរុញការអនុវត្តគោលនយោបាយរបស់រាជរដ្ឋាភិបាលដេីម្បីផលប្រយោជន៍ជាតិ និងប្រជាជន។